Plantun de Prouvènço

Pèr coumpara dos planto d'encò nostre

Polypodium interjectum & Aquilegia atrata

Polypodium interjectum

Polypodiaceae

Nom en français : Polypode intermédiaire.

Descripcioun :
Aqueste poulipòdi-mejansié trachis dins li roucas séusous souto li bos o dins li gaudre, valènt à dire dins de relarg umide. Se dis mejansié pèr-ço-qu'es un pau entre Polypodium cambricum e Polypodium vulgare. Pamens fai de foundo mai grando e toujour dous cop mai longo que larjo. Après, au contro de P. cambricum, a de soro sènso péu (parafiso). Pèr la bèn destria fau regarda lis espourange au microuscope (x 100) pèr verifia que i'ague pas mai de 10 celulo à l'assiso mecanico.

Usanço :
Couneissèn pas d'usanço particuliero pèr aquelo planto. Fabrico d'acide filicinico ço que ié douno uno óudour de champignoun. Escriéure au site se n'en sabès mai.

Port : Pichoto planto lignouso
Taio : 15 à 30 cm
Fueio : Foundo
Tipe bioulougico : Emicriptoufite
Cicle bioulougico : Planto renadivo

Gènre : Polypodium
Famiho : Polypodiaceae

Ordre : Polypodiales

Coulour de la flour : Ges de flour
Petalo : ges
Ø (o loungour) flour : Ges de flour
Flourido : Autouno - Ivèr

Sòu : Si
Autour basso e auto : 0 à 1700 m
Aparado : Noun
Setèmbre à mars

Liò : Roucas - Gaudre
Estànci : Mesoumediterran à Mountagnard
Couroulougi : Éurasiatico
Ref. sc. : Polypodium interjectum Shivas, 1961

Galantino(-negrinello)

Aquilegia atrata

Ranunculaceae

Àutri noum : Aglantino, Gant-de-pastresso, Erbo-de-Nosto-Damo.

Nom en français : Ancolie noirâtre.

Descripcioun :
La galantino-negrinello es uno poulido planto que trachis au nostre subretout en basso mountagno. Pèr la destria de si cousino fau regarda lis estamino dóu dedins que dèvon pas s'acaba en pouncho (un pau redouno-fotò). En mai d'acò aquéstis estamino despasson li petalo de mai de 3 mm. Après li flour soun mai founso e un pau pu pichoto qu'encò de Aquilegia vulgaris. Pensa de coumpara en quichant sus la flècho verdo aqui souto.

Usanço :
Poudèn pensa qu'a li mémi prouprieta que Aquilegia vulgaris.